View Single Post
  #3447  
Old 6th December 2011
friend_just_buddy's Avatar
friend_just_buddy friend_just_buddy is offline
:known stranger:
  Mr Xossip: Mr XP Contest Winner    Super Moderator: Moderator of all forums    Silver Coins: Contributed $25-$100 for XP server fund      
Join Date: 2nd August 2008
Location: Xp
Posts: 69,565
Rep Power: 113 Points: 41106
friend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps databasefriend_just_buddy has hacked the reps database
Quote:
HAR SAANS TERI KHAATI KYAA KASANM THEE,
NIGAAHO ME TERI VO KISKAA GHUM THAA,
Quote:

KIYE THE TUNE JO VAADAA E WAFAA ,

HAQEEKAT THEE TERI YAA FIR MERAA BHRAM THAA….



Gataank se aage………


Sarkaari hospital me ek bed par behosh padi huyi Niharika ki aankhe dheere dheere khulati hain. Usako ye ehsaas bhee nahi hotaa ki vo kitani der tak behosh rahi thee….. khulati aankho ke saath usake vichaar bhee jaagane lagate hain…. Thodi hee der me usako asal vastu-sthiti kaa aabhaas hotaa hai aur vo uth kar baithanaa chaahati hai par ek jodi shaath usake kandhe ko dabaate hue usako uthane se rokataa hai……. Is sparsh ko bhala vo kaise naa pehchaanati, aakhirkaar ye to usake bachpan se usake saath judaa huaa sparsh thaa…. Haa … ye usaki maa hee to thee….. Usaki maa usake bed ke side stool par baithee huyi thee. unaki aankhe bheegi huyi thee….. honth laraj rahe the…… chehare par duniyaa ke saare dukh bhare bhaaw umad rahe the…..hote bhee kyo naa …..abhee chand dino pahale hee jis beti ki khushiyo par naaj karati vo thak nahi rahi thee ab usee ki haalat par taras khaane ke siwaa kuchh aur nahi kar sakati thee vo….


Maa ko dekhate hee Niharika ki rulaayi phoot padi……. Usaki maa ne bhee usako rokaa nahi…. Niharika bilakh bilakh kar ro rahi thee…. Bahut rone ke baad jab usake aansuo me kami aane lagi tab usane khud hee apane aansu ponchhate hue….jab usane apani maa ko dhyaan se dekhaa tab use ye ehsaas huaa ki usaki maa bhee usake saath hee ro rahi hai….usane haath badhaa kar apani maa ke aansuo ko ponchh daalaa aura pane aansu bhee ponchhate hue uth kar baith gayi….


“aap kab aayi maa!?” Niharika ne subakate hue apani maa se puchhaa….

“jaise hee teri khabar bheji Rai sahab ne, mai bhala kaise ruk sakati thee yaha aaane se…..” Maa ne bhee hichkiyo ke beech jawaab diyaa….
“Rai sahab ne aapako bulaayaa hai yahaa…. Kyaa bola unhone mere khilaaf…”Niharika ne hairaani jataate hue bola…..


“vo bhalaa kyaa bolate… bahut hee sankshep me jitanaa bataa sakate the, utanaa unhone bataayaa…yahaa aane par meri to himmat bhee nahi ho rahi thee ki unase najare milaa saku….. par vo vaakayi me devataa hain…. Mere saath vo purv-vat sammaan se hee pesh aaye…Unhone kuchh bhee bad-saluki nahi ki…..naa hee tere kiye kaa ulaahanaa mujhe diyaa…. Bas itanaa he kahaa ki ‘Niharika! Ko sambhaaliye … naa jaane usako kyaa sujhaa jo usane ye sab kar daalaa….. Rohit ki baato ko agar humane pahale hee dhyaan se sunaa hotaa to shaayad aaj meri Sulochana jindaa hoti…’…. Bas itanaa hee kahaa thaa unhone ….. aur humako yahaa le aaye…. Yahaa ke doctors se bhee to unhone tumhaaraa khaas khyaal rakhane ko kahaa hai….(lambee saans chhodate hue)… ye sab kyaa hogayaa Niharika!.... naa jaane teri kismet me kya likhaa hai
jo tu is puraani bimaari se abhee tak ubar nahi paayi……”….. Niharika ki maa ne thandi saans lete hue kahaa…..

“kyaa bimaari….. kaun see bimaari ki baat kar rahi ho maa….” Niharika ne chillaate hue kahaa ….. “mujhe bhala kaun see bimaari thee jisake baare me tum kah rahi ho….” Niharika ne hairaani jataate hue puchhaa…. Is vakt fir se hairaaniyo ne usake chehare par apani jagah banaa lee thee…..


“chup kar ….dheere bol…kisi ne sun liyaa to bahut gadbad ho jaayegi…..” Niharika ki maa ne use dapat’te hue kahaa…..


“usako chup karaa kar aap ab kuchh nahi kar sakati MATA ji……” Bhaarat ne kamare me ghusate hue kahaa….. jise dekhate hee Niharika aur usaki maa ke chehare ke baaw badal gaye…..


“lagataa hai maine is vakt aap logo ko disturb kar diyaa ….. ab kyaa karu… humaaraa kaam hee logo ko disturb karanaa hai….” Bhaarat ne apane chuteele andaaj me chutaki lete hue kahaa jisane Niharika ko timilaane par majbur kar diyaa…


“apani bakwaas band karo aur yahaa se dafaa ho jaaiye….. mujhe meri maa se baat karani hai….” Niharika ne fufkaarate hue kahaa……


“are waah!..... lagataa hai aap bhul gayi ki abhee aap kin haalaat me yahaa baithee huyi hain…. Mohtarrimaa! Aap ek muljimaa hai jo ek full aur half murder case me police ki custody me hain ….. par ab tak aapane itane logo ke khoon se apane haath rang daale hain ki aapako ye sab maamuli baate lagati hongi…. Kyo ..sahi kahaa naa maine….” Bhaarat ne apani vyangatmak andaaj ko jaari rakhaa ….. jisane Niharika ke ghaawo par namak chhidakane ke siwa kuchh aur naa kiyaa……



“abhee meraa vakt kharaab hai Dsp……. jo chaahe bol lo par mai jaanati hu ki mai begunaah hu …. Mujhe fansayaa gayaa hai….is vakt meri kisi bhee baat ka yakeen karane waalaa koyi bhee nahi hai….. meri maa bhee naa jaane kis bimaari ki baat karake mujhe bahalaa rahi hai….” Niharika ne ekdum ruwaansi aawaaj me kahaa….


“Are mata ji !. Inaki baato se mujhe bhee yaad aayaa ki ahee thodi der pahale aap kisi bimaari ki baat kar rahi thee….. jaraa hum bhee sune ….. ye bimaari wahi to nahi jisaki vajah se aapane Niharika ko bachan me inaki Naani ke yahaa bhej diyaa thaa….” Bhaarat ne Niharika ki maa se sawaal kiyaa…..



Niharika ki maa ne koyi jawaab nahi diyaa……


“mai aapase bahut adab se pesh aa raha hu mata ji….. mujhe policiyaa ravaiyyaa akhtiyaar karane par majbur naa kariye…. Is sawaal ke jawaab ki vajah se ho sakataa hai ki aapaki beti ki jaan bach jaaye….mat bhuliye ki inake upar khoon karane kaa pukhtaa iljaam hai jisase ye ab bach nahi sakati …. To yadi aap apani beti ki khariyat chaahati hain to humaare saath co-operate kariye….” Bhaarat ne itne thande andaaj me ye baat kahi ki ek baaragi to Niharika aur usaki maa, dono ke reedh ki haddi me thandi lahar daud gayi…..


“kyaa meri beti bach jaayegi…” Niharika ki mata ji ne Bhaarat se aashbhari najari se dekhate hue poochhaa….


“ vo sab aapaki dee huyi jaankaari par nirbhar karataa hai mata ji! … aap pahale mujhe vo baat to bataaiye jo aapaki ab tak bataa deni chaahiye thee….” Bhaarat ne mata ji se kahaa…..


Niharika ki aankho me bhee ab utsukataa najar aane lagi…..use yakeen hee nahi ho rahaa thaa ki usake baare me koyi behad aham baat usaki maa ne usase chhipaa rakhi hai yaa aaj tak use apane baare me koyi khaas baat kaa pataa hee nahi hai….


Niharika ki maa ne bolanaa shuru kiyaa….


“ye baat kaafi pahale ki hai jab Niharika bahut chhoti thee….. humaare pados me ek pariwaar rahataa….. us pariwar ko Niharika bahut pyari lagati thee….. humeshaa hee Niharika ko unake ghar me koyi naa koyi khilataa he rahataa thaa….. us pariwar me husband-wife ke saath unakaa ek chhotaa betaa aur jawaan shaadishudaa ladaki rahati thee….. us ladaki ke sasuraal waalo ne us par dahej ke liye bahut julm kiyaa thaa jisase tang aakar vo ladaki apane maa-baap ke saath rahane lagi thee…. Usakaa divorce case adalat me chal rahaa thaa jisaki vajah se usako apane sasuraal waalo ki taraf se roj dhamaki mil rahi thee par vo apane sasuraal waalo ko sajaa dilwaane ke liye adig thee…. Fir ek din jab Niharika unake ghar me khel rahi thee tabhi us ghar par kuch agyaat logo ne humalaa bol diyaa aur pure ghar waalo ko badi hee bedardi se maar daalaa….. Niharika! Shayad chhupaa-chuppi kaa khel rahi thee jisaki vajah se vo ek bed ke neeche chhipi huyi thee aur un logo ko ye aabhaas bhee nahi huaa hogaa ki un chaaro ke siwaa koyi aur bhee us ghar me ho sakataa thaa…… vo katle-aam kaa manjar Niharika ne umra ke us chhote daur me dekhaa thaa jab usakaa mann kaafi kachchaa thaa….vo khauf aur kroorataa usake zehan me baith gayi….. chunki un logo ne kale kapade pahan rakhe the…. Isako sapane me bhee kale kapade waale aa kar daraayaa karate the….. baad me us ladakike sasuraal waale is hatyaakand me pakade gaye par humaari Niharika ke zehan me vo khooni manjar kabhi naa mitane ke liye chhap chukaa thaa….”


Itanaa kah kar mata ji kuchh der ke liye khaamosh ho gayi…. Bhaarat! Jo abhee tak saari baate khaamoshi se sun rahaa thaa, ne aage badh kar unako paani pilaayaa…… Niharika bhee ye saari baate badi hee hairaani se sun rahi thee….. usako to ye baate yaad hee nahi aa rahi thee ….. par apani maa ki baat ko bhala ko vo kaise kaat sakati thee…… paani piaa kar Bhaarat ne mata ji ko aage bolane kaa agrah kiyaa….. aur mata ji ne bhee lambee saans bharate hue ruki huyi kahaani ko aage badhaanaa shuru kiyaa…..


“Niharika ki chanchalataa jaise koyi chheen le gayaa….. vo ekdum gambheer ho gayi thee… usaki muskurahat humehsaa ke liye gayab ho gayi thee…. Hoti bhee bhala kyo naa! … jin laasho ko humane apane aaknho se dekhaa thaa unako laash banate hue isane apane saamane dekhaa thaa…… ghar kaa khulaa darwaaja isako daraa detaa thaa…. Achanak se hee ye chillaane lagati thee……. Isako kale kapade waale log dikhane lagate the….. hum kaafi pareshaan hokar isakaa har jagah ilaaj karane lage the par kahi koyi faayadaa nahi huaa… fir isaki nana ji yaani mere pita ji ne jo us samay jindaa the, apane saath le gaye….. jagah badalane se shayad isakee sehat me sudhaar aa jaaye’ aisaa soch kar isake pita ji ne aur maine isako isake nana ji key aha bhej diyaa…. Mere pita ji ne isako unake aadhyatmik guru se milawaayaa, unhone Niharika kaa ilaaj praachen paddhati se karanaa shuru kar diyaa….. vakt bahut lagaa par aakhir kaar humaari bachchi theek ho gayi….. aaj jab Rai sahab ne saari baate bataayi ki kaise yaha aate vakt hee Train me Niharika ke saamane us kale kapade waale ne katl kiyaa aur kaise vo baar-baar is ghar me dikhaayi de rahaa thaa….. to mujhe turant isake bachpan ki baate yaad aa gayi ….. haalaat ke thapede khaa kar meri bachchi ki bimaari shayad vaapas usake zehan par haawi ho gayi….” Ye sab bolate bolate Niharika ki mata ji foot-foot kar rone lagi…..


Bhaarat ye saari baate sun kar aur mata ji ko rotaa dekh kar duvidhaa me fans gaya thaa… usako kuchh soojh hee nahi rahaa thaa….. aur Niharika….. Niharika is vakt apane aap se hee vo saare manjar yaad karwaa rahi thee jab us raat train me , usake cabin me pahale vo Kundan laal aaya thaa….. usake bad jab vo kale kapade waala us cabin me ghusaa thaa tab se lekar ab tak kyaa vo kisi mugaalate me jee rahi thee…… vo kale kapade waalaa usake cabin me nahi aaya thaa tab us Kundan daas ki hatyaa kari kisane thee?..... Bhaarat ki aawaaj ne usaki vichaar shrinkhalaa todi……


“mujhe to pahale se hee shak thaa ki vo katl Niharika ne kiyaa thaa….kyonki humaari kisi bhee enquiry me kisi kale kapade waale kaa kahi koyi jikraa he nahi mil rahaa thaa…. Aur ab to aapaki baat sun kar ye 2 me 2 jodane jaisaa aasaan kaam ho gaya hai ki vo katl Niharika ne hee apane zunooni aawesh me aakar kiyaa higaa…. Kyonki us Kundan daas kaa apani hee jeb se chaaku nikaal kar Niharika ki garden par rakhane jaisee baat mere gale se neeche nahi utar rahi thee….. ye chaaku-faaku kisi mawaali ke haath me expect kiya jaa sakta hai par Kundan daas ek naami shahari thaa….. aur usaki jeb se chaaku ….. (gardan ko nakaraatmak dhang se hilaate hue) almost impossible…. (Niharika ki taraf dekhate hue).... bas ab lage haatho us hotel waale katl ko bhee sweekaar kar lo to mai is case me tumhaari bimaari ko maddenajar rakhate hue tumhe kam se kam sajaa dilwaaungaa……” Bhaarat ne apane chehare par muskaan late hue kahaa….


“ usaki bimaari ko aap apane liye vardaan maan rahe honge Dsp.sahab jisane baithe bithaaye aapako ek case solve karwaa kar aapaki case book me high grades add karwaa diye honge par hum usaki bimaari me kiye usake anjaan gunaaho ko usaki jindagi par haawi nahi hone denge…” Rai sahab apani wheel chair par baithe us kamare me ghusate hue bolate hain jo naa jaane kab se ye saari baate baahar khade sun rahe the….



“meri beti ko agar ho sake to maaf kar dijiyegaa Rai sahab! Isane jo bhee kiyaa vo sab naadaani me kiyaa….” Niharika ki maa ne apani jagah se utate hue aura pane dono haath jodate hue kahaa…..


“ kaash aapane hume ye baate vakt rahate hee bataa dee hoti to …aaj humaari Sulochana jindaa hoti…… are jab hum apane ‘chhote’ ki bimaari sahit use apanaa sakate the to bhala hum Niharika ko kaise nakaar dete….. anjaaneme jo paap Niharika se ho gayaa hai vo usake liye kam se kam sajaa paaye, yahi humaaraa lakshyaa rahegaa….. Dsp.sahab! hume ummeed hai ki is kaam me aap koyi adchan pesh nahi karenge…..” Rai sahab ne apani baat khatm karate hue kahaa…..


“meri koyi jaati dushmani to hai nahi inase jo mai inake peechhe pad jaau….. bas gunahgaar ko usake kiye ki sajaa mile! Yahi meraa mukhyaa uddeshyaa rahataa hai…… Kundan daas ka maamalaa ab to clear ho gayaa par us hotel waale katl kaa kyaa hogaa?.... Niharika aur Rohit hee us case ke main accuse hain…..” Bhaarat ne kahaa…


“ kisi ek case me Niharika ki sanlagntaa ye nahi darshaati ki har katl ko aap usee ke naam kar denge…… madad karane ke bahaane aap apanaa swaarth mat siddh kariye….. saat gharo kaa discount to daayan bhee de deti hai…. Aap to fir bhee insane hain janaab….. us katl me jab tak aapake paas koyi thos buniyaad naa ho aap usame Niharika kaa naam nahi le sakate…. Us katl me to balki aapako Rohit ke saath tehakikaat karani chaahiye thee jo aapane kee bhee thee…. Abhee Niharika kaa us katl me kahi door door se koyilink najar nahi aa raha hai……” Rai sahab ne behad chubhate hue andaaj me apani baat khatm kari……


Niharika aur usaki maa! Dono hee Rai sahab ki taraf hairaani se dekh rahi thee aur soch rahi thee ki kaise koyi insaan kisi aise shakhs kaa saath de sakate jisake upar usakee pyaai biwi kaa katl kaa iljaam lagaa huaa hai……Rai sahab ki ijjat dono maa-beti ki aankho me hajaar gunaa badh gayi thee….


Par Niharika ko is vakt kuchh aur bhee thaa jo pareshaan kar rahaa thaa….. vo bas yahi soche jaa rahi thee ki bhala kis tarah mai apane bhram ko door karu…. Maine itanaa sab kar bhee diyaa aur mujhe aabhaas bhee nahi huaa…aisaa kaise ho gayaa mere saath…. Meraa sach aaj mere liye hee jhooth kaise ban sakataa hai….. mai apani maa ki kahi baato kaa kyaa jawaab du …vo ye sab soch hee rahi thee ki Bhaarat ki aawaaj ne usaki tandra bhang kari……


“ mata ji! Jo baate aapane bataayi hain …un sabaki hume padtaal karani padegi atah aap Niharika ki nanihaal aur un swami ji ke ashram kaa pataa hume bataa dijiye….. aap ki kahi har baat kaa cross verification kiyaa jaayegaa tab hee Niharika ke case ko dusare angle se dekhaa jaayegaa…… varnaa…..”


B
haarat ne apani baat ko beech me hee chhod diyaa par kamare me maujud kisi ke liye us adhuri baat kaa matlab samajhanaa mushkil nahi thaa……


*****-----*****-----*****


Niharika ki maa se mile pate ke aadhaar par Bhaarat ne unake dwara dee huyi tamaam jaankaari ko cross check kiyaa…. Baat kaafi puraani thee par binaa kisi mushkil ke un saari baato ki jaanch ho gayi aur ye pataa chalaa ki Niharika ki maa ki kahi gayi saari baate sach thee….. jin swami ji ne Niharika ka ilaaj kiyaa thaa vo to swargwaasi ho gaye the par unaki diary me Niharika kaa jikraa maujood thaa…. Jisako aadhaar banaa kar Bhaarat ne court me Niharika kaa case pesh kar diyaa….. niyat samay par court ki karywaahi shuru ho gayi…..


Court me samay bahut bheed lagi huyi thee….. kahi ek til rakhane bhar ki jagah bhee nahi thee…. Is bheed me Niharika ko kayi jaane pehchaane chehare dikhe par ek chehare ko bahut miss kar rahi thee….. jisakaa cheharaa use nahi dikhaa vo thaa BHUSHAN……. Bhushan naa jaane kahaa thaa jo usako dikh nahi rahaa thaa….. par abhee usako is baat kaa koyi bahut jyadaa fark nahi pad rahaa thaa….. Judge ke aane ke baad ek niyat samay par Niharika ke case ke number ki ghoshanaa ki gayi…. Sarkari vakeel ne Niharika par aaropop ki jhadi lagaani shuru kar dee… jisame ummeed ke mutabik Sulochana ke katl ke saath hee saath Rohit par jaan lewaa humalaa aur Kundan daas ke katl to the hee …… hotel me maare gaye us Rampur ke vyapaari kaa katl bhee shaamil kar diyaa gayaa thaa. Jisake liye police kaa tark thaa ki unako mile CCTV ke video footage se jis mahilaa ka aks dikhaa thaa usane jo kapade pahan rakhe the, Niharika ke wardrobe ki talaashi me mile kapado me se ek thaa….atah haalat ke maddenajar Niharika ke upar hee sabase jyada shak ki buniyaad me us par ye mukadma chalayaa jaaye. Judge ne is baat ke liye apani permission bhee de dee……


Niharika abhee tak apane aap ko is baat ke liye maansik roop se taiyyaar nahi kar paa rahi thee ki ye sab kuchh usane kiyaa thaa…… usako apane dimaag ki kamjori par yakeen hee nahi ho rahaa thaa….. par Sulochana ko maarane ke baad bhee Rai sahab ke ravaiyye me apane aura pane pariwaar ke prati koyi bhee fark naa padataa dekh usane apani anjaani bhool ko sweekaar kar liyaa thaa….. apr vo kyaa thaa jo usako khatak rahaa thaa…. Aisaa kyaa thaa jo usakaa mann apani maa ki baat ko sun’ne ke baad bhee nahi maan rahaa thaa…… usane kisi ki hatyaa kar dee aurusake zehan ke kisi kone me bhee ye jaan kaari mil rahi…. Aisaa bhala usake saath kyo ho raha hai…..court me sarkaari vakeel us par aaropo ki jhadi lagaaye jaa rahaa hai…. Jisake jawaab me Rai sahab aaj khud naa jaane kitane saalo baad kisi ki pairavi kar rahe the…..



“kyaa mai vaakayi paagal hu?.....” ye ek iklautaa sawaal Niharika ke zehan me lagaataar goonj rahaa thaa…… “ kyaa meri hee tarah duniyaa kaa har paagal khud ke liye yahi sochata hogaa jaise mai khud ke baare me soch rahi hu….. kyaa hakeekat hai aur kya BHRAM….. isakaa khulaasaa kaise hogaa…..” court me chal rahi har bahas se anjaan Niharika apane andar ki hee bahas me ulajhi huyi thee….. “meraa apanaa vajood hee aaj sabase badaa BHRAM ban baithaa hai mere liye….” Usake sar me asahneey dard uthane lagaa jise dono haatho se dabaa kar vo apane aap ko hee tasalli dene lagi…. Par jab asahneey hotaa chalaa gayaa tab vo ek cheekh maar kar behosh ho gayi…….


To be continued……….
______________________________

बड़ी गुस्ताख है तेरी यादें, इन्हें तमीज सिखा दो..
दस्तक भी नहीं देती, और दिल में उतर आती हैं…

My story-:-
Illusion......Ek Bhram???
(Completed)

Reply With Quote
Page generated in 0.01499 seconds